Sjå nøye på biletet. Til venstre for sjakkbrettet sit denne hobbysjakkspelar, trebarnsfar og politikar.

Til høgre for brettet sit tidenes største sjakkspelar Garri Kasparov og den som kan bli verdas beste om kort tid, norske Magnus Carlsen (for tida nr. 4 i verda og tidlegare omtala her)

Kasparov, assistert av Magnus, gjer meg eit grunnkurs i Najdorfvarianten i Siciliansk, som eg spelte “på ein litt umoderne måte” som Kasparov diplomatisk sa det.

Det er ikkje så ofte du kan få litt opplæring av dei beste i verda. Opptrinnet det er snakk om her skjer etter at Trond Giske og eg har spist lunsj med dei to sjakkspelarane, toppidrettssjefen, Simen Agdestein, stortingsrepresentant Marianne Aasen og nokre til. Der diskuterte vi sjakkhistorie, sjakk i skulen, sjakk-OL og det faktum at Kasparov skal trene Magnus. Meir om det her

Det er fleire interessante kommentarar til dei siste postane mine. Arne har skrive eit langt og interessant skuleinnlegg på bloggen sin. Eg er samd i mykje av det du skriv. Endringar i arbeidsmåtar og kvalitet er vel så viktige som endringar i kvantitet (t.d fleire timar) i skulen. Eirik spør om psykologi som programfag. Her er vi i ferd med å gjere eit vedtak, eg skal sørge for at du vert kontakta. Pål skriv om samiske lærebøker. Det er ei historie for seg sjølv, som eg skal forsøke å kome attende til.

Eg er dessutan samd med Jørgen. Nettavisen er best blant dei store riksavisene på nett. Bergens Schakklubb er kanskje beste medium! PS! Noreg vann siste runde i sjakk-OL, og blei nummer 21.

I helga var vi tre sjuke og ein frisk – den minste jenta mi. I det eg trudde vi var over det, så byrja Agnes å kaste opp i kveld. Etter nokre timar har ho sovna no. Eg skal arbeide litt.

I morgon vert årets sjakk-OL avslutta. Sjakk-OL er ei stor og tradisjonsrik turnering som vert spela annankvart år. I 2008 går arrangementet av stabelen i tyske Dresden. Det er eit stort arrangement med vel 160 deltakarland. Det er både dameklasse og herreklasse (eller åpen klasse som den heiter).

Nivået er særs høgt i denne verdsidretten, det er tøft å hevde seg. Noreg stiller eit sterkt lag i år som eg trudde kunne hevde seg høgt oppe. Etter ein særs god start med siger mot Kina og uavgjort mot England, har ikkje Noreg innfridd. Laget ligg som nummer 28 før siste runde.

Fleire norske aviser har dekning av turneringa, sjå mellom anna Nettavisen som kanskje er Noregs beste medium på sjakk. Den offisielle heimesida med resultat, live parti mm finn du her.

Eg er ein stor sjakkentusiast, og kjem garantert tilbake til dette flotte spelet seinare.