Sterk vekst i søkninga til høgare utdanning. Den store vinnaren er læraryrket. 35% vekst i søkninga til allmenlærarutdanninga – 1000 fleire på eit år -  og vekst også for dei andre lærarutdanningane (Aftenposten VG). Det er fantastisk bra, og veldig viktig. Det er likevel berre starten. GNIST-samarbeidet skal halde fram i minst tre år, og vi skal bruke nye midlar på kvalitet i skulen og kampanje for å få fleire til å søke neste år.

I ettermiddag klokka 15.00 blir det feiring med partnarar og lærarkake i KD. Hurra!

I dag har vi presentert rekrutteringskampanjen “Har du det i deg”. Vi vil rekruttere fleire til læraryrket, og har sett i gang det som visstnok er den største rekrutteringskampanjen nokon sinne i offentleg sektor. Her finn du nettsida. Det heile skjer i regi av GNIST-samarbeidet, som du kan lese meir om her.

Eg har også lagt ut link og invitasjon på Twitter i dag til ein (uformell) test du kan ta for å sjekke om du passar som lærar. Kva syns du om kampanjen?

No drar eg på landsmøte. Meir derfrå.

Takk for mange gode råd i kommentarar som vart lagt ut til GNIST-posten. Lønn, fråfall, statleg styring vs lokal handlefridom og lærarane sin kompetanse var blant emna.

Eg vil kort svare på eit spørsmål. Elisabeth er provosert over at ordninga med avskriving av studielån for dei som tek PPU berre gjeld språk og realfag. Grunnen til det er at vi veit at vi har særlege og akutte rekrutteringsproblem på desse faområda. Mange av realfagslærarane og språklærarane nærmar seg pensjonsalder, og skular slit allereie med å få kvalifiserte søkarar.

I dag har Tora Asland og eg, saman med mellom anna Utdanningsforbundet, KS, NHO og LO, presentert eit partnerskap som vi kallar GNIST. GNIST er ei stor mobilisering for lærarane i Noreg, og har særleg tre hovudmål: Å rekruttere fleire lærarar, å skape ei betre lærarutdanning og å støtte og utvikle dagens lærar, til dømes gjennom meir vidareutdanning.

For å rekruttere fleire til yrket gjennomfører vi ei rekke tiltak. Ein rekrutteringskampanje, avskriving av studielån for dei som vil utdanne seg til lærar, ei lektor II-ordning der nye yrkesgrupper kan kome inn i skulen og anna. På fredag legg vi fram forslag til ei ny lærarutdanning. Denne vil stille høgre krav til fagleg kompetanse enn det tilfellet er i dag, og den vil utruste lærarane med betre evne til å formidle fag og og handtere den praktiske kvardagen i klasserommet. Det konkrete kjem på fredag. Støtten til dagens lærarar handlar mellom anna om vidareutdanning. Vi har i budsjettet for 2009 presentert ei varig satsing på vidareutdanning for lærarar. Vi bruker 400 millionar kroner på å gje lærarar høve til å heve kompetansen sin.

I dag kom også nyhenda om at det vart særs få nye lærarårsverk i skulen. Lærartettleiken har gått opp under den raud-grøne regjeringa, medan det gjekk feil veg under forrige regjeringa. Men endringa er berre marginalt til det betre. Sjølv om kommunane har fått meir pengar, har det mange stader ikkje gått til fleire lærarar. Barnehage og eldreomsorg er vinnarane lokalt, ikkje skule. Dette er langt dårlegare enn ambisjonane. På mandag i forrige veke løyva vi 2 mrd meir til kommunane. Dette må no mellom anna gå til å tilsetje fleire lærarar. Vi må også vurdere nye grep for å sikre at skule faktisk vert prioritert lokalt.

Sjå dekning av desse sakene her (Aftenposten, Dagsavisen, Dagbladet)