No har vi lagt fram Soria Moria 2, og du kan sjølv ta stilling til kva du likar og ikkje likar i dokumentet.

Min analyse er om lag slik: Soria Moria1 var Europas mest radikale regjeringsplattform. Det var stor endringskraft og mykje entusiasme frå valkampen, og etter å ha lagt fram erklæringa var alle vinnarar på alt. Det er tøft å følge opp det, med mindre trykk på endring og mindre økonomisk handlingsrom.

I byrjinga av prosessen var eg redd dette skulle bli “stille i båten”. Med dokumentet litt på avstand, og ei grov gjennomlesing av det meste, må eg seie at det vart det ikkje. Det er heller “videre til venstre”.

Grovt sett er SM2 eit skritt til venstre på miljø, utanrikspolitikk og likestilling, same retning på dei fleste velferdsfelt og ei innstramming av asylpolitikken.

Eg skal ikkje bruke mykje tid på asyl, anna enn å seie at eg meiner mange overdriv dette. Dei fleste punkta som ligg er allereie vedtatt, så er det nokre innstrammingar. Det er ikkje FrP-politikk, det er AP-politikk. Som valet gav større styrke. NOAS har nokså edruelege kommentarar.

To-tre andre ting syns eg er verdt å merke seg. Utanrikspolitikken markerer enno ein sving mot venstre. Eg har høyrd enkelte seiet at i utanrikspolitikken, der har ikkje SV innverknad. Eg meiner SV har hatt særleg stor innverknad der, og det held fram med dette dokumentet. Det er eit program for avskaffing av atomvåpen, betre kontroll med våpensal, gjeldsslette, styrka utviklingspolitikk og ei klår norsk stemme internasjonalt.

Når det gjeld likelønn set vi i gang prosessen som kan ende med ein likelønspott og eit stort likelønnsløft. Vi gjev eit klårt signal om at vi vil bidra, og ber partane i arbeidslivet avklåre kva grupper som skal omfattast og og korlesi dei vil sikre mekanismar for å gjere det varig. Denne strategien har vi skissert før, og det er berre slik vi kan få til eit løft. Inga regjering kan dele ut ekstra pengar utan forpliktande avtalar om kven som skal få dei og korleis dei skal sikre likelønn. Ellers får vi ikkje eit likelønnsløft, men eit udefinert lønnsløft. Organisasjonane er delte. NTL er positive, Utdanningsforbundet betinga positive og Sjukepleiarforbundet negative.

I itllegg til dette er eg godt nøgd med delen om utdanning. Eg syns den har ein klårare kunnskap- og mestringsprofil denne gongen, og klårare proritering av kva som er viktig. Det er framleis stasting på læraren i sentrum, med kompetansehveing og lovfesta norm for nok lærarar, men også SFO-reform og meir praksis.  Eg meiner også at mijlø og klima gjennomsyrar dokumentet langt betre enn sist.

Eg har hatt sjansen til å følge mediebiletet både på nett og TV i kveld. Her er hovudtemaet asylinnstrammingar, med meir vekt på “SVs tap” enn på innhaldet i saka. I det heile tatt, SV som taper er eit eit standhaftig gjennomgangstema i norsk politikk. “Bilde av et SV som bare taper er så sterkt at virkeligheten sliter med å trenge gjennom medias filter” skriv Andreas Halse i denne bloggposten. Dei som analyserer med litt senka skuldre har lett for å finne spor av SV sine 6.2%. Etter å ha sett SV i kveld kan ein verkeleg lure på kva som gjer nett denne mediedramaturgien så sterk?

Tusen takk for stort engasjement og mange innspel til Soria Moria 2 forhandlingane. Mange av innspela er generelle og dreier seg om kva vi skal prioritere eller legge vekt på (som t.d å få til ei større satsing på fornybar energi), men mange er også heilt spesifikke (om studiefinansiering eller adopsjonsstøtte).

Eg skal bruke helga på å gå gjennom dei siste kommentarane og systematisere det heile, samstindes som eg gjer andre førebuingar til SM2.

No er eg på veg til landsstyremøte i SV der vi skal oppsummere valet og diskutere vegen vidare.

Tidsklemma tar meg for alvor. Eg skulle svart om barnehagar, kristenfolk og Sponheim men med program frå 8-22 har eg ikkje makta dei siste dagane. Skal svare om barnehagar så raskt eg kan, deretter spørsmål om LO-kristenfolk. Det andre får kanskje passere no? Eg slit med å halde tritt slik det er no, for å seie det som det er.

Ellers alt bra! Rundt forbi i Akershus på dagen i dag, Litteraturhuset om klima på kvelden. I morgon er det Kristin på politisk kvarter mot Sponheim og god måling for SV og raud-grøne.  Eg skal i nokre debattar med Ine Eriksen Søreide.

På fredag skal eg vere gjesteredaktør i Nettavisen. Eg har valgt meg ei tema, som er klimaendringane og Noreg. Under den paraplyen har eg tenkt å undersøke ulike ting. Kva kan faktisk skje her på berget som følge av klimaendringane? Korleis kan du hindre oljeboring i Lofoten? Kvar bruker vi dei beste forskarane våre i dag, fossilt eller fornybart? Kva er biletet av Noreg internasjonalt?

Men eg treng fleire tips! Har du forslag til saker under denne headingen, eller litt i ytterkanten, så legg igjen kommentar!

Ei ny meiningsmåling som er offentleggjort i dag, mellom anna i Nordlys, viser fleirtal i Nord-Noreg mot oljeboring utanfor Lofoten og Vesterålen. Tala har gått litt opp og ned dei siste åra. Det er ikkje eit rungande nei, men eit knapt fleirtal mot.

Ei rimeleg oppsummering er at Nord-Noreg er delt i to når det gjeld oljeboring utanfor Lofoten.

Rett før helga kom det ei anna måling. Den viste at alle mandat som var inne frå dei tre nord-norske fylka til Stortinget – med eit unnatak – var for oljeboring. Årsaka var at SV var ute i Troms og Finmark, og berre hadde eit mandat inne i Nordland.

Med andre ord; Folkefleirtalet i Nord-Noreg kan bli nesten utan representasjon på Stortinget i den mest profilerte saka i Nord-Noreg så langt i valkampen. Det er eit paradoks som både sentrale kommentatorarar som redaktør Hans Kristian Amundsen i Nordlys og politikarar som Pål Julius Skogholt og Lena Jensen bør gå djupare inn i.

Men vi kan gjere noko med det. For i alle tre fylka sloss SV med høgresida om eit mandat. Det vil vere spesielt om Nord-Noreg si stemme i Oslo skal peike i ei heilt anna retning enn folkemeininga. Det bør vere mobiliseringsgrunnlag for både SV og miljøengasjerte veljarar framover.

Valkampen byrjar i desse dagar med valkampopningar og starten på TV-sendingane. Men valkampen har sjølvsagt starta for lenge sidan også. La oss kalle den fasen vi har vore i dei siste veken for opptakten til innspurten. Kva er biletet så langt?

Det er ingen klår tendens på målingane så langt. For eit år sidan trudde alle det skulle regjeringsskifte. Så kom finanskrisa, og ein kraftig framgong for dei raud-grøne og AP særleg. FrP tok igjen mykje av det tapte etter utspelet om snikislamisering, og sidan det har det vore jamnt og stabilt mellom blokkene. Statsvitar og valanalytikar Svein Tore Marthinsen viser at ikkje er særleg klåre eller sterke tendensar etter sommaren heller. SV ligg til dømes heilt flatt (utan ned- eller oppgong), både på lokale og sentrale målingar. Dei fleste nasjonale målingar den siste veka har hatt eit knapt, borgarleg fleirtal.

Dagsorden i opptakten er sprikande og litt overraskande. Det begynte med ein klassisk skatt/velferd/fordelingsdebatt sett i gong av Stein Erik Hagen. Langesundulukka gjorde brått miljø til ei stor sak, og etter kvart Lofoten til den viktigaste regionen i valkampen. Den siste veka har vore prega av litt av kvart; litt eldreomsorg, litt skule og SFO, litt kriminalitet, litt kultur og litt meir miljø.

Dessuten forlot Jens-Jensen toget stasjonen. Førebels har ikkje AP-FrP aksen dominert så totalt som nokre spådde. Både Erna og Kristin er tungt profilert, dagsorden i valkampen peikar i sprikande retning og folk er som vanleg opptekne av å høyre frå dei partia dei vurderer (AP el SV i år? V el H?), ikkje berre hovudmotstandarane.

Neste veke er det skulestart, starten på TV-valkampen og ulike valkamp for fulle muggar over heile landet. Trendar, både i dagsorden og målingar kan kome når som helst, men førebels er alt overraskande stabilt. Det gjer auka styrke til det ein kvar valkamp eigentleg handlar om:

Resultatet blir ikkje slik det ser ut no. Det skjer alltid endringar den siste månaden, til dels store endringar.

Det har lenge vore lite skifting mellom blokkene. Sjølv om dette skulle auke noko mot valet, vil den viktigaste drivaren for endring vere folk som bestemmer seg, eller dett ned frå gjerdet om du vil. Det er å mobilisere reserver av tidlegare og potensielle veljarar, samt å vinne konkurransen om dei som vaklar mellom 2-3 “naboparti” det eigentleg dreier seg om.

Eit viktig spørsmål er då kven som har litt å gå på. På mange av målingane er FrP fullmobilisert. Dei har nesten ingen tidlegare veljarar på gjerdet. Dersom mange tvilarar fell ned på sine ulike parti, medan FrP ikkje vinn nye, så vil det aleine dra ned FrP sin relative andel av stemmene.

SV er i den andre enden av skalaen, vi har mange tidlegare veljarar som tviler. Men vi er ikkje aleine.

Mobilisering, det er stikkordet.

Har vore Østfold rundt i dag – eller ikkje akkurat, men innom Sarpsborg, Fredrikstad og Moss. I Sarpsborg slapp vi nyhenda om at byen får det åttande regionale vitensenteret i Noreg. På biletet her viser dei meg rundt med Osmund Ueland i spissen. I Moss var det kulturskulebesøk, i Fredrikstad var det intervju om skule og møte i barnehage.

Eg var også på nasjonal opplæringskonferanse, ein stor årleg konferanse om vidaregåande opplæring, der eg hadde foredrag. Det er meir å seie om turen, men det er seint så vi får la det bli med det.

Det er veldig god og positiv stemning der ute. Kjerneveljarane er klare for fire nye år, mykje entusisasme. Men mange sit også på gjerdet, og har nok ikkje heilt teke stilling enno. Trur valet blir jamnt.

Noreg har visst knust Skottland i dag. Moro, men kan ikkje skjule meir fundamentale problem. Skal kome attende til min analyse av landslaget sine problem.

 Audun Lysbakken og eg inviterer i dag til digital spørretime kl 12.30

SV har valkampopning i dag. Etter den vil vi følge opp pressekonferansen på Parkteateret med ei digital valgkampopning. Allereie no kan du stille spørsmål til Audun og meg på http://rettvenstre.no og http://bardvegar.no. Skriv  i kommentarfeltet til denne posten. Hugs å skrive spørsmålet ditt på bloggen til den du vil skal svare. Dei 5 mest populære spørsmåla frå kvar blogg vil bli besvart mellom 12.30 og 13.30 i morgon. For å stemme kan du lage ein profil her.

I tillegg til at innsendte spørsmål vil få svar, vil det også foregå ei livesending i Cover It Live der alle er invitert til å stille spørsmål om SVs valkamp og politikk. Dette kan du gjere direkte i Cover It Live vinduet eller via twitter med hashtagen #SVlive.

Vi prøver oss med denne kombinasjonen no, så får vi sjå korleis det går. Eg trur det kan skape litt meir system i dei innsendte spørsmåla, samstundes som ein faktisk kan kommentere og forhalde seg til det som skjer på opninga.

Her kan du følge spørretimen:

http://bardvegar.no

http://rettvenstre.no

http://sv.no

Ny veke. Den “offisielle” valkampen nærmar seg med stormskritt, vi har valkampopning på tysdag 11.august. Eg kjem attende med meir informasjon om den i morgon.

På laurdagsrevyen kunne du skå presentasjonen av vårt framlegg om ei SFO-satsing. SV vil ha nasjonale kvalitetsstandardar i SFO. Så vil vi ha ein gratis time SFO kvar dag for alle barn, der det mellom anna skal vere leksehjelp og fysisk aktivitet. Så vil vi ha ein makspris på resten av SFO-tilbodet.

Dagens Næringsliv skriv i dag at kjende investorar som Christen Sveaas og Stein Erik Hagen gjer millionar av kroner til FrP sin valkamp. Faktisk gjer dei to åleine nesten like mykje som heile valkampbudsjettet til SV (to millionar kvar, medan SVs budsjett er på 4,7 millionar totalt).

Det er sjølvsagt heilt lovleg å gje pengar til eit parti. SV får til dømes økonomisk støtte av LO til denne valkampen, og vi har samla inn ein del småpengar gjennom mindre beløp i hundrekronersklassen.

Men la det ikkje vera tvil: Hagen og Sveaas har enorm eigeninteresse av å støtte FrP. Dersom FrP og Høgre får regjeringsmakt vil dei til gjera store omvendte fordelingsgrep. Dei vil gje dei rikaste i Noreg milliongåver gjennom å fjerne formueskatten. I løpet av ein fireårsperiode vil Stein Erik Hagen få 55 millionar kroner og Christen Sveaas 14,7 millionar kroner, basert på formuetal frå 2007.

Det kallar eg ei god investering. Eller utgift til inntekts ervervelse om du vil!

I sum er formueskatten om lag 12 milliardar kroner. Det er om lag like mykje som heile barnehageløftet - pris, kvalitet, utbygging – kostar oss ekstra i år samanlikna med i 2005. 93% av all formueskatt vert betalt av personar med meir enn 1 million i netto formue. Vi har i denne perioden gjennomført ei kraftig omfordeling i formueskatten, som gjer at dei med store fomuar betaler meir medan 400.000 nordmenn slepp formueskatt.

PS! I avisene i sommar vart det varsla ei “kronerulling” for FrP blant ein del folk med pengar. Kronerulling her betyr 10.000 pr person. Det er under grensa for kva ein må oppgje offentleg av pengegåver. Eg meiner likevel det er av offentleg interesse å vite kva menneske med makt og pengar i Noreg som støttar FrP med 10.000. Det er eit uttrykk for politisk støtte, og for dei fleste er det ikkje eit småbeløp. Nokon som tar ballen?

I dag har eg vore i Hurdal i Akershus. Eg besøkte Blindeforbundet sit syns- og mestringssenter, leirstaden Haraldsvangen og transittmottaket Husebyvangen som Hero driv. Lærerik og spennande dag.

NRK har “kåra” SV sin kampanje på nett www.oppavsofaen.no til den beste så langt i valkampen. Fortent syns eg, eg skreiv om den i går og for utruleg positive tilbakemeldingar frå dei eg har sendt den til. Vi har flinke folk på partikontoret vårt som har stått bak idèen, og vi har hyra inn proffe og kreative folk til å sette det ut i livet.

Eg vil også tilrå ein lytt på Venstre sin valkampsong. Den har mange orginale tekstlinjer som “Lykken er en smed med såre hender”. Teksten ligg ute her.